Ельскі раён размешчаны на паўднёвым захадзе
Гомельскай вобласці ў межах Мазырскага Палесся.
На поўдні раён прымыкае да мяжы Рэспублікі Беларусь
з Украінай, працягласць мяжы складае 85 км.; на поўначы мяжуе з Мазырскім
раёнам, працягласць мяжы складае 65 км.; на захадзе - з Лельчыцкім, працягласць
мяжы 36км. і на ўсходзе - з Нараўлянскім, працягласць мяжы 40км.
Геаграфічная плошча раёна складае 1360 кв.км.
(136568 га) ці каля 3,5% агульнай плошчы Гомельскай вобласці. З іх 57,3% плошчы
складаюць лясы, 42,182 тысяч га - сельгасугоддзі, 22,277 тысяч га - ралля,
18,735 тысяч га - лугавыя (сенакосы і пашы). Бал сельгасугоддзяў - 24,0, раллі
- 26,9. Каля 70 % лясоў складаюць іглічныя пароды, астатнія - бяроза, алешына,
дуб і іншыя лісцяныя пароды.
Ельшчына адносіцца да Жыткавіцка-Мазырскага
агракліматычнага раёна. Сярэдняя тэмпература студзеня - 6,1 градус Цэльсія,
ліпеня 18,6 градусаў Цэльсія. Абсалютны мінімум - 38 градусаў, максімальны 38
градусаў. Ападкаў выпадае за год 590-610 мм. Сярэдняя гадавая хуткасць ветра
3,5 м. сек.
Адміністрацыйным і культурна-гаспадарчым цэнтрам
раёна з'яўляецца горад раённага падпарадкавання Ельск, размешчаны ў 367 км.
паўднёвей г.Мінска і ў 170 км. паўднёва-заходней г. Гомеля.
На тэрыторыі раёна знаходзяцца 11 вадасховішчаў,
найбольшыя з якіх: Ліноўскае (111,5 га), Качышчанскае (73 га), Бабруйкаўскае
(98 га), Паўлаўскае (48 га), Данілаўскае (19,1 га), Зашырскае (14 га).
Рэкі
належаць да Прыпяцкага гідралагічнага раёна. Найбольшыя: Славечна (37км.) з
прытокамі Чэрцень (28км.), Батыўля (34км.), Ясянец (23км.); Жалонь (36км.),
Мытва (8,6км.). Найбольш паўнаводная рака Славечна.