Навіны рэспублікі
04.12.2018
Брусель распрацаваў пакет мер па павелічэнні выкарыстання еўра ў такіх стратэгічных сферах, як энергетыка, сыравінныя тавары, самалётабудаванне, у спробе абмежаваць дамінаванне долара ў якасці сусветнай рэзервовай валюты. Аб гэтым паведамляе ТАСС са спасылкай на брытанскую газету Financial Times.
У праекце дакумента Еўракамісіі, які будзе прадстаўлены на разгляд лідараў ЕС на маючым адбыцца ў снежні саміце, гаворыцца, што ўмацаванне міжнароднай ролі еўра неабходна для павышэння эканамічнага суверэнітэту ЕС з улікам палітыкі, якая праводзіцца прэзідэнтам ЗША Дональдам Трампам. Брусель лічыць неабходным дзейнічаць у адпаведнасці з "нядаўнімі праблемамі адносна кіравання і гандлю на аснове міжнародных правіл". Гэта заўвага, як лічыць выданне, з'яўляецца скрытай спасылкай на агрэсіўную гандлёвую палітыку адміністрацыі Дональда Трампа.
У гэтай сітуацыі, лічаць у ЕК, краіны - члены ЕС павінны гарантаваць, што кантракты, заключаныя ў рамках міждзяржаўных энергетычных пагадненняў, будуць у еўра. Адзначаецца, што на гэты момант больш за 80 працэнтаў імпарту Еўрасаюзам энергарэсурсаў у доларах. Выкарыстанне еўра набывае асаблівую значнасць для Бруселя ў сувязі з намаганнямі еўрапейскіх краін па захаванні здзелкі з Іранам, якая абмяжоўвае ядзерныя распрацоўкі Тэгерана.
Садзейнічанне павелічэнню глабальнага выкарыстання еўра адлюстроўвае палітычную, эканамічную і фінансавую вагу блока ў больш шматпалярным свеце, указваецца ў праекце дакумента.
Дональд Трамп 8 мая аб'явіў аб выхадзе Вашынгтона з Сумеснага ўсёабдымнага плана дзеянняў (СУПД) - здзелкі, якая была заключана ў 2015 годзе і абмяжоўвала ядзерныя распрацоўкі Тэгерана ў абмен на адмену санкцый Савета Бяспекі ААН і аднабаковых абмежавальных мер Злучаных Штатаў і Еўрасаюза.
Еўрасаюз выказаў шкадаванне ў сувязі з выхадам ЗША з СУПД і аднаўленнем амерыканскі санкцый у адносінах да Ірана. Еўрасаюз таксама ўвёў у дзеянне еўрапейскі блакіруючы рэгламент, які аб'яўляе недзеючымі на сваёй тэрыторыі экстэрытарыяльныя санкцыі ЗША ў адносінах да Ірана, забараняе еўрапейскім кампаніям іх выконваць, а таксама забараняе выкананне любых рашэнняў замежных судоў, прынятых на падставе гэтых санкцый.
Вярхоўны прадстаўнік ЕС па замежных справах і палітыцы бяспекі Федэрыка Магерыні таксама анансавала стварэнне новай плацежнай сістэмы для падтрымання бізнесу з Іранам ва ўмовах санкцый ЗША. Сістэма будзе садзейнічаць таму, каб нафтавыя кампаніі і прадпрыемствы прадаўжалі весці гандаль, не разлічваючы на рынак і долар ЗША.
Да спіса